مسلمانوں کی آبادی 16 فیصد، لیکن مرکزو 16ریاستوں کی حکومت میں حصہ داری صفر

آزادی کے بعد پہلی بار پارلیمنٹ میں حکمران جماعت کا کوئی مسلمان رکن نہیں بچا۔ بی جے پی کے پاس اس وقت لوک سبھا اور راجیہ سبھا میں 394 ممبران پارلیمنٹ اور ملک بھر میں 1,379 ایم ایل اے ہیں۔ ان میں سے ایک بھی مسلمان نہیں ہے۔ حکومت میں حصہ داری کا بھی یہی حال ہے۔ پہلی بار مرکزی حکومت اور 16 ریاستوں کی حکومت میں کوئی مسلم وزیر نہیں ہے۔

ہندی روزنامہ دینک بھاسکر نے اپنے ویب سائٹ پرانوراگ آنند کی ایک رپورٹ شائع کیا ہے جس میں بتایاگیا ہے کہ پارلیمنٹ میں مسلمانوں کی نمائندگی کا یہ سب سے برادور ہے۔

رپورٹ کے مطابق 1952 میں مسلمانوں کی تعداد 10فیصد تھی، جبکہ لوک سبھا میں مسلمانوں کی نمائندگی 4 فیصد تھی۔ وہیں 2019 میں مسلمانوں کی تعداد بڑھ کر15 فیصد ہوئی لیکن لوک سبھا میں مسلمانوں کی نمائندگی 4.9 فیصد ہی رہی۔

اسی طرح زیادہ مسلم آبادی والے9 ریاستوں میں مسلم ایم ایل اے کی تعداد دیکھیں تو یہ آزادی کے بعد سے ہی آبادی کے تناسب میں کم رہی ہے۔

1961 سے 2019 تک سب سے زیادہ 28 فیصد اوسط مسلم آبادی والے آسام میں کل منتخب ارکان اسمبلی کی تعداد 19 فیصد ہے۔ کیرالہ میں 22 فیصد مسلم آبادی میں 17 فیصد ممبران اسمبلی ہیں۔ جبکہ بنگال میں مسلمانوں کی آبادی 23 فیصد بتائی جاتی ہے لیکن اس ریاست میں ممبران اسمبلی کی تعداد 14 فیصد ہے۔ اترپردیش میں مسلمانوں کی آبادی 17 فیصد ہے جبکہ ممبران اسمبلی کی تعداد 9 فیصد ہے۔ اسی طرح بہار میں 14 فیصد مسلم آبادی میں 7 فیصد ممبران اسمبلی ہیں۔ کرناٹک میں 11 فیصد مسلم آبادی پر 3 فیصد مسلم ارکان اسمبلی، آندھراپردیش میں 9 فیصد مسلم آبادی ہے جبکہ 3 فیصد ارکان اسمبلی ہیں۔ اسی طرح راجستھان میں 8 فیصد مسلم آبادی پر 3 فیصد ممبران اسمبلی ہیں اور گجرات میں 9 فیصد مسلم آبادی ہے جبکہ 2 فیصد ہی ایم ایل اے ہیں۔
ملک میں بھلے ہی مسلم دوسری بڑی آبادی ہو لیکن اس وقت مرکزی حکومت میں ایک بھی مسلم وزیرنہیں ہے۔ مرکزی حکومت کے نیشنل کمیشن فار مائناریٹی میں سب سے بڑی اقلیت طبقہ سے صرف ایک رکن سید شہزادی کو ممبر بنایا گیا ہے۔

ریاستی حکومتوں میں وزراء کا جائزہ لیا جائے تو مغربی بنگال میں کل 48 وزراء ہیں جن میں 17 فیصد مسلم وزیرہیں۔ کیرالہ میں 20 وزراء میں 15 فیصد مسلم وزیر، آسام میں 16 وزراء میں مسلم وزیرکی تعداد صفر، یوپی میں کل 53 وزیرہیں جن میں مسلم وزیرکی تعداد 1.8 فیصد ہی ہے۔ اسی طرح بہار میں کل 31 وزراء میں 6.45 مسلم وزیر ہیں۔ کرناٹک میں کل 29 وزراء میں مسلم وزیرصفر ہیں جبکہ آندھرپردیش میں 24 وزراء میں 4.16 فیصد مسلم وزیر ہیں۔ راجستھان میں کل 30 وزیرہیں جن میں مسلم وزیر کی تعداد 7 فیصد ہے۔ گجرات میں 25 وزیرہیں جن میں مسلم وزیر کی تعداد صفر ہے۔

سیاسی پارٹیوں میں مسلمانوں کی صورتحال یہ ہے کہ 2019 میں لوک سبھا میں تقریبا 56 فیصد سیٹوں پر جیت حاصل کرنے والی سب کا ساتھ سب کا وکاس کا نعرہ بلند کرنے والی بھارتیہ جنتا پارٹی میں ایک بھی مسلم ایم پی نہیں ہے۔

واضح رہے کہ 2007 لوک سبھا انتخاب میں بھارتیہ جنتاپارٹی نے 7 مسلم امیدوارکھڑا کیا تھا جبکہ 2019 میں 6 مسلمانوں کو ہی امیدواربنایا تھا۔

راجیہ سبھا میں کل 245 ممبران میں 91 ارکان بھارتیہ جنتاپارٹی کے ہیں۔ دنیا کی سب سےبڑی پارٹی ہونے کا دعوی کرنے والی بھارتیہ جنتاپارٹی کے 31 ریاستوں و مرکزکے زیرانتظام ریاستوں میں ایک بھی مسلم ایم ایل اے نہیں ہے۔

پالیٹیکل ایکسپرٹ ابھے دوبے مسلمانوں کی نمائندگی میں کمی کے تین وجوہات بتاتے ہیں۔ وہ کہتے ہیں گذشتہ عرصہ میں مسلمانوں کی نمائندگی میں تیزی سے کمی آئی ہے، لیکن اس کے لئے صرف بھارتیہ جنتا پارٹی ذمہ دار نہیں ہے بلکہ غیر بی جے پی پارٹیاں بھی ذمہ دار ہیں۔ سیاسی پارٹیاں مسلمانوں کو کم ٹکٹ دیتے ہیں یا صحیح جگہ سے ٹکٹ نہیں دیتے ہیں جہاں سے وہ انتخاب جیت سکیں۔

انہوں نے دوسری وجہ بتاتے ہوئے کہا کہ مسلم سیاست کا بھی اپنا مسئلہ ہے۔ مسلمانوں میں اعلی ذات یعنی اشراف حاوی ہیں۔ جو اجلاف پسماندہ، ارزال ہیں ان کے ہاتھ میں سیاست نہیں ہے، یہ بھی ایک وجہ ہے۔

ابھے دوبے نے تیسری وجہ اور سب سے بڑی وجہ ملک کی سیاست میں ہندوتووادی سیاست کا فروغ ہونا بتایا ہے۔ انہوں نے کہا کہ سب کو لگنے لگا ہے کہ مسلمانوں کا ذکر کریں گے تو ہندو ناراض ہوجائیں گے۔ اس لئے وہ ووٹ لینا تو چاہتے ہیں، لیکن زبان نہیں دینا چاہتے۔

ایک دیگر سیاسی ایکسپرٹ راش قدوائی کا کہنا ہے کہ 2014 کے بعد سیاسی حالات بدل گئے ہیں۔ بھارتیہ جنتاپارٹی کو لگتا ہے کہ مسلمانوں کے ساتھ گئے تو انہیں ووٹ نہیں ملے گا۔ ایسے میں بی جے ہی ہندوتو کارڈ کے سہارے آسانی سے انتخاب جیت جاتی ہے۔

انہوں نے یہ بھی کہا کہ اقتدار میں آنے کے بعد سے ہی بھارتیہ جنتا پارٹی اور مسلمانوں کا آپسی رشتہ کافی اتار چڑھاؤ والا رہا ہے۔ ووٹوں کا پولرائزیشن مسلمانوں کی کم ہوتی نمائندگی کی اہم وجہ ہے۔   

ابھے دوبے کا کہنا ہے کہ ہندوستانی سیاست میں مسلمانوں کے حاشئے پر جانے سے کوئی فائدہ نہیں ہونے والا ہے بلکہ صرف نقصان ہی ہوگا۔ سب سے بڑا نقصان یہ ہوگا کہ جمہوریت کے 20 کروڑ لوگوں میں مایوسی ہوگی۔ انہوں نے کہا کہ پارلیمنٹ اور اسمبلیوں میں مسلمانوں کی تعداد کم ہونے سے ہندوستان کی ساورین ریٹنگ کم ہوگی اور کئی ممالک ہندوستان کو قرض دینا بھی بند کریں گے جس کا ٹریڈ پر بھی اثر پڑے گا۔