تعلیم کے بغیر صحت مند اورترقی یافتہ معاشرہ کی تشکیل نہیں ہوسکتی: امیر شریعت

پٹنہ: امارت شرعیہ بہار،اڈیشہ وجھارکھنڈ نے دینی وعصری تعلیم کے میدان میں نئی نسل کی ذہنی وفکری تربیت کرنے اور معاشی اعتبار سے انہیں خود کفیل بنانے کے لئے متعدد تعلیم گاہیں قائم کی ہیں، جو اللہ کے فضل وکرم سے کامیابی کے ساتھ چل رہی ہیں، اس ادارہ نے تعلیم یافتہ مسلم نوجوانوں کو اپنے پیر پر کھڑا کرنے کے لئے اعلیٰ تعلیم کے مواقع فراہم کرنے کی بھی برابر جدوجہد کی ہے، ابھی ماہ جنوری 22ء میں دسویں جماعت کے طلبہ وطالبات کو دسویں بورڈ کی تیار ی کرانے کے لئے کریش کورس کا اہتمام کیا جس کا رزلٹ صد فی صد رہا، ان میں سے 24طلبہ وطالبات نے رحمانی 30 کے داخلہ امتحان میں نمایاں کامیابی حاصل کی، اس موقع پر ان کے اعزاز واکرم میں مفکرملت امیر شریعت حضرت مولانا سید احمد ولی فیصل رحمانی مدظلہ کی صدارت میں ایک ترغیبی اجلاس2/جولائی 2022ء کو امارت شرعیہ کے میٹنگ ہال میں منعقد ہوا، جس سے خطاب کرتے ہوئے حضرت امیر شریعت مدظلہ نے فرمایاکہ پھلواری شریف حلقہ کے جن طلبہ وطالبات نے امارت شرعیہ کے کوچنگ سنٹر سے استفادہ کیا اور رحمانی30 کے داخلہ امتحان میں کامیابی حاصل کی،میں انہیں دل کی گہرائی سے مبارکباد دیتاہوں،رحمانی 30 کے ذمہ دار، اساتذہ اور متظمین سب ہمارے شکرے کے مستحق ہیں، جنہوں نے طلبہ وطالبات کی ذہنی وعلمی تربیت دے کر انہیں اس لائق بنایا۔انہوں نے فرمایاکہ یہ عہد مقابلہ کاہے جو اس سے پیچھے رہ گئے وہ کوئی اعلیٰ مقام حاصل نہیں کرسکتے۔ اس وقت ہندوستان میں اعلیٰ تعلیم کے 148 انسٹی ٹیوٹ  IIT، NI،I,RSCوغیرہ قائم ہیں اس میں ہمارا تناسب بہت کم ہے۔ ہمارے بچے کی شرح اگلی اور مطلوب تعلیم سے بہت کم ہے،ہم چاہتے ہیں کہ ہمارے بچے ہرممکن کوشش کریں اوروہ ممتاز عہدوں پر فائز ہوں تاکہ ان کی معاشی بدحالی دور ہوسکے،کیوں کہ تعلیم کے بغیر صحت مند معاشرہ کی تشکیل نہیں ہوسکتی۔

حضرت امیر شریعت نے اپنے صدارتی خطاب میں یہ بھی فرمایاکہ کامیابی ایک عادت ہے جس کو لگانی پڑتی ہے اس لئے جب یہاں فارم کی خانہ پری ہوتو ہربچہ اس کو اس سے فائدہ اٹھائے، اس کے لئے ہم سب کو فکر مند ہونا پڑے گا، یہ کام کسی ایک فرد اور ادارہ کا نہیں ہے بلکہ سب کو مل کر آگے بڑھنا ہوگا، حضرت امیر شریعت نے فرمایاکہ جن بچوں نے کریش کورس سے فائدہ اٹھایا اوروقت کی پابندی کی ان کی حاضری کا تناسب 95فیصد رہا،آج ان کی فیس واپس کی جارہی ہے اورانشاء اللہ یہ سلسلہ آئندہ کے لئے بھی جاری رہے گا، نائب امیر شریعت حضرت مولانا محمد شمشاد رحمانی قاسمی نے فرمایاکہ کریش کورس کے تین ماہ کا تجربہ حوصلہ افزا رہا، اگر ہم لوگ محنت کریں تو ہمیں آگے بھی کامیابی مل سکتی ہے، اس میں آپ سب کا تعاون بھی چاہئے۔ انہوں نے کہاکہ مفکراسلام امیر شریعت سابع حضرت مولانا سیدمحمد ولی رحمانی ؒ نے مسلم نوجوانوں کی معاشی حالت کو بہتر بنانے کے لئے رحمانی 30 قائم کیا جہاں آج وہ ملک کاایک ممتاز،مثالی سنٹربن گیا۔ اس وقت یہ ادارہ ان کے صاحبزادے انجینئر بھائی محمد فہد رحمانی کی قیادت میں آگے بڑھ رہاہے، وہاں کے داخلہ امتحان میں امارت شرعیہ کے جونیئرپروگرام کے24طلبہ وطالبات کا کامیاب ہونا ایک خوش آئندبات ہے، اگر اجتماعی کوشش کی جائے اور باصلاحیت اساتذہ فراہم کرائے جائیں تو ہم لوگ اس طرح کا سنٹر ہرضلع میں قائم کرنے پر غور کریں گے۔

امارت شرعیہ کے قائم مقام ناظم اور اجلاس کے کنوینر مولانا حکیم محمد شبلی القاسمی نے تمہیدی گفتگو کرتے ہوئے فرمایاکہ تعلیم کی راہوں سے گذرکر ہی انسان ترقی کی شاہ راہ پر گامزن ہوتاہے، اس لئے امارت شرعیہ نے تعلیمی میدان میں نمایاں خدمات انجام دی ہے۔ ابتدائی دینی تعلیم کے لئے پانچ سالوں میں دس ہزار آبادیوں میں مکاتب کے قیام کا ہدف رکھاگیاہے۔اس CBSEطرز کے کئی اسکول بھی قائم کئے گئے اورآئندہ کا بھی منصوبہ ہے۔ امارت ٹیکنیکل انسٹی ٹیوٹ کے ذریعہ پندرہ ہزار بچوں کو روزگارفرائم ہواہے۔ نوجوان کی مالی ترقی کے لئے اعلیٰ عہدوں تک پہونچنے کے خاطر امارت شرعیہ نے کئی منصوبے بنائے ہیں۔ ابھی حالیہ دنوں میں 3 ماہ کا کریش کورس چلایاگیا جس سے بچوں نے فائدہ اٹھایا اوررحمانی 30 کے داخلہ امتحان میں کامیاب ہوئے، انہوں نے بتایاکہ10ویں جماعت کے طلبہ وطالبات کو امتحان کی تیاری کے لئے امارت شرعیہ نے کریش کورس کا اہتمام کیا،74بچے اس نظام سے جڑے۔آخر میں 43طلبہ نے مکمل فائدہ اٹھایا، اس میں 95فیصد حاضررہنے والے طلبہ وطالبات کی فیس آج واپس کی جارہی ہے، ضرورت ہے کہ پھلواری علاقہ کے بچے اس نظام سے وابستہ ہوں اوراپنے مستقبل کی تعمیر کریں۔

رحمانی 30 کے دائریکٹر انجینئر جناب محمد حامدولی فہد رحمانی نے فرمایاکہ یہاں کے300بچوں میں 74نے کریش کورس سے جڑے جس میں 43 بچوں کو کامیاب قرار دیاگیا، اس میں 22بچوں نے رحمانی30کے مشکل امتحان میں کامیابی حاصل کی۔ انشاء اللہ آئندہ بھی اس کی ترقی کے لئے راہیں آسان ہوں گی۔ انہوں نے اعداد وشمار کے حوالہ سے بتایاکہ اگر ہم لوگوں نے اس نظام کو مضبوط ترکیا تو مرکزی حکومت کے نیشنل انسٹی ٹیوٹ ایمپوٹنٹ کے اداروں میں ہمارے بچے پہونچیں گے جس سے ان کی اقتصادی حالت بہتر ہوگی۔

امارت شرعیہ نے جونیئرپروگرام کے ذریعہ ایک چراغ جلایاہے،طلبہ فائدہ اٹھائیں:وزیر اقلیتی فلاح

حکومت بہار کے اقلیتی فلاح کے وزیرمحمد زمان خان نے کہاکہ امارت شرعیہ نے ایک چراغ جلایاہے اس کی روشنی سے ہم سب کو فائدہ اٹھاناہے۔ انہوں نے کہاکہ ہماری حکومت بھی اقلیتی تعلیمی اداروں کو مضبوط بنانے کے لئے فکر مند رہتی ہے۔ تیرہ مقامات پر اقلیتی ہوسٹل کا فیصلہ کیاہے۔ اگر ہم سب لوگ آپسی صلاح ومشورے سے خاکہ بناکر کام کو شروع کریں گے تواس سے ملت کو فائدہ پہونچے گا۔ اس مقصد کے لئے ہم لوگوں کی ایک نشست ہونی چاہئے۔

پروفیسر غلام غوث صاحب نے کامیاب ہونے والے طلباء کو مبارک باد دیتے ہوئے کہاکہ امارت شرعیہ کا یہ کارنامہ ایک تاریخی کارمانہ ہے۔ لیکن بنیادی سطح پر ابتدائی تعلیم کو فروغ دینے۔ مکاتب کو قائم کرنے اور عام لوگوں کو تعلیم سے جوڑنے کی خصوصیت کے ساتھ ضروری ہے۔ تعلیم کو عام بھی کیاجائے اورآسان بھی کیاجائے، اس کے بغیر ہماری معاشی بدحالی دور نہیں ہوسکتی۔

رکن اسمبلی اخترالاسلام  شاہین نے کہاکہ تعلیمی پسماندگی کو دور کرنے کے لئے امارت شرعیہ کی اس طرح کی خصوصی نشست برابرہونی چاہئے۔

بہار شیعہ وقف بورڈ کے سابق چیرمین جناب ارشادعلی آزاد صاحب نے کہاکہ ہرضلع میں اس طرح کے کریش کورس شروع کئے جائیں۔ اس کے لئے کوئی قانونی دشواری نہیں ہے۔ یہاں وزیر اقلیتی فلاح موجود ہیں وہ اس سلسلہ میں جگہ اور مقام کا تعین فرمائیں۔

مولانا شکیل احمد قاسمی صاحب نے کہاکہ اس طرح کے کورس پورے بہار میں چلانے کی ضرورت ہے۔ رحمانی تھرٹی نے پھلواری شریف کی آبادی میں ایک تجربہ کیا جو پہلے سے اس کی مستحق تھی۔ جناب ارمان ملک نے کہاکہ تعلیم ترقی کی شاہ راہ ہے، اس کے بغیرترقی نہیں مل سکتی۔ اس لئے ہمیں اس کو ایک چیلنج کی شکل میں قبول کرنا چاہئے۔ امارت شرعیہ اور رحمانی تھرٹی نے جو کامیاب جونیئر پروگرام شروع کیا اوراس میں وہ کامیاب بھی ہوئے اس کے لئے وہ شکریہ کے مستحق ہیں۔ مولانا اعجاز احمد صاحب سابق چیرمین مدرسہ بورڈ نے کہاکہ امارت شرعیہ نے ایک مضبوط قدم اٹھایاہے، اس کے لئے وہ قابل تحسین ہے،میں رحمانی تھرٹی کے ذمہ دار اوراساتذہ کو بھی مبارکباد دیتاہوں۔ ہولی ویژن اسکول سمن پورہ کے دائریکٹرجناب صابرصاحب اور بے بی لینڈکے ڈائریکٹر جناب شمیم اقبال صاحب نے کہاکہ امارت شرعیہ کی خدمات قابل قدر ہیں ہم سب لوگ آبادی کی طرف سے آپ کے ممنون ہیں۔ ہم لوگوں پر جو ذمہ داریاں سپرد کی جائیں گی ہم آپ کا بھرپور تعاون کریں گے۔

اس ترغیبی اجلاس میں جن طلبہ وطالبات کی حاضری کا تناسب95فیصد سے زیادہ رہاان  ہونہارطلبہ وطالبات کی فیس حضرت امیر شریعت، نیزحضرت نائب امیر شریعت،مولانامفتی محمدثناء الہدی قاسمی، مولانامفتی محمد سہراب ندوی،مولانا سہیل احمد ندوی، مفتی سہیل احمد قاسمی، مولانا قاضی انظار عالم قاسمی، مفتی سعیدالرحمن قاسمی، مولاناقاضی وصی احمد قاسمی اور مولانا قاضی محمد انورقاسمی کے ہاتھوں واپس کی گئی۔ آخر میں یہ نشست حضرت امیر شریعت مدظلہ کی دعا پر اختتام پذیر ہوئی۔