وجے کمار چودھری  – ایک با بصیرت سیاست داں

بہار ہر زمانہ میں علم و ادب کا گہوارہ رہا ہے۔ یہ زمانہ قدیم سے صوفیوں، سنتوں، بزرگوں اور رشی منیوں کی سرزمین رہی ہے۔ یہاں ہر مذہب کے پیروکار موجود ہیں اور اسے ہر زمانہ میں عزت کی نگاہ سے دیکھا گیا ہے۔ اس کی اپنی شاندار تاریخ ہے جس پر اہل بہار بجا طور پر فخر کرسکتے ہیں لیکن اپنی شاندار تاریخی وراثت کے باوجود یہ بھی صحیح ہے کہ مختلف وجوہات سے  بہار ترقی کی رفتار میں ملک  کی دیگر ریاستوں کے مقابلہ میں بہت پیچھے چھوٹ گیا۔ لیکن یہ امر باعث اطمینان ہے کہ اب بہار تیزی سے ترقی کا سفر طے کر رہا ہے۔ بطور خاص وزیر اعلی نتیش کمار کی قیادت میں اس نے ترقی کے بہت سے منازل طے کئے ہیں۔ نتیش کمار انصاف کے ساتھ ترقی میں نہ صرف یقین رکھتے ہیں  بلکہ سماج کے سبھی فرقے اور طبقے کی بہبود کا کام کر کے اپنے اس یقین کو عملی شکل بھی عطا کی ہے۔

ہم سب واقف ہیں کہ بہار میں این ڈ ی اے کی سرکار ہے اور نتیش کابینہ میں این ڈ ی اے کی تمام جماعتوں سے وزیر لئے گئے ہیں۔ اتحاد کی سرکار میں ہر جماعت اپنے اپنے  کوٹے کے وزرا کو نامزد کرتی ہے۔ نتیش کمار نے اپنی جماعت سے جن لوگوں کو وزارت میں جگہ دی ہے ان کا انتخاب بہت ہی سوجھ بوجھ کے ساتھ ان کی صلاحیتوں کو دیکھتے ہوئے کیا ہے۔ ان میں ایک بے حد اہم اور نمایاں نام جناب وجے کمار چودھری کا ہے جو نہ صرف تعلیم یافتہ اور با بصیرت ہیں بلکہ بہترین انتظامی تجربہ بھی رکھتے ہیں۔

وجے کمار چودھری سمستی پور کے  سرائے رنجن حلقہ کی نمائندگی کرتے ہیں۔ ان کے والد آنجہانی جگدیش نارائن چودھری بھی جو مجاہد آزادی تھے تین بار دلسنگھ سرائے حلقہ سے اسمبلی میں نمائندگی کر چکے ہیں۔ دلسنگھ سرائے ان کا آبائی وطن بھی ہے۔ وجے کمار چودھری تاریخ میں ایم اے ہیں اور سیاست میں آنے سے قبل وہ بینک پروبیشنری افسر رہ چکے ہیں۔ والد کی وفات کے بعد ان کی سیاسی وراثت کو آگے بڑھانے کے لیے وجے کمار چودھری نے ملازمت سے استعفیٰ دے دیا۔ انہوں نے مختلف وزارتوں کی ذمہ داری بحسن و خوبی نبھائی ہے اور کارہائے نمایاں انجام دئیے ہیں۔ آبی وسائل کے وزیر کی حیثیت سے درگاوتی آبی ذخائر کی تکمیل کا سہرا انہی کے سر جاتا ہے۔ واضح ہو کہ یہ سینچائی کا ایک بہت بڑا اور کار آمد پراجیکٹ ہے جس کی شروعات ۱۹۷۶ میں ہوئی تھی لیکن زمین کی دستیابی اور ماحولیاتی رکاوٹ جیسے امور کی وجہ سے ۳۸ سال تک یہ پراجیکٹ تشنۂ تکمیل رہا۔ یہ جناب چودھری کے عزم مصمم کا نتیجہ ہے یہ  ۲۰۱۴ء میں یہ پایہ تکمیل کو پہنچا۔ اسی طرح ان کی قیادت میں آبی وسائل کی وزارت نے ۴۴۴۲ کروڑ کی لاگت سے آٹھ ندیوں کو جوڑنے کا  پراجیکٹ بھی شروع کیا۔ اس کے علاوہ بھی انہوں نے مختلف وزارتوں میں اپنی صلاحیتوں کے عمدہ نقوش چھوڑے ہیں۔

وزیر تعلیم کی حیثیت سے بھی ان کی کار کردگی لائق تحسین ہے۔ تعلیم کے فروغ کے تئیں بے حد سنجیدہ ہیں اور بہار میں تعلیم کا معیار و مقدار بڑھانے کے لیے فکر مند رہتے ہیں۔ ان کا خیال ہے کہ بہار کی صلاحیتوں کا استعمال بہار میں ہونا چاہیے۔ گزشتہ ماہ وزیر اعلی نتیش کمار کی قیادت اور ان کی نگرانی میں 41 ہزار سے زائد اساتذہ کی بحالی ہوچکی ہے اور عنقریب ایک لاکھ اساتذہ کی بحالی ہوگی۔ ان کا خیال ہے جو  با صلاحیت ہیں انہیں موقع ملنا چاہیے۔ وہ کہتے ہیں کہ  جن کے پاس وسائل ہیں وہ اپنے بچوں کو کہیں پڑھا لیتے ہیں لیکن ان کی ترجیح ان بچوں کو پڑھانا ہے جو وسائل سے محروم ہیں۔ اسے وہ ایک چیلنج تسلیم کرتے ہیں اور اسے یقینی بنانے کے لیے فکر مند رہتے ہیں۔

وجے کمار چودھری کو بہار اسمبلی کے اسپیکر ہونے کا بھی اعزاز حاصل ہے۔ بحیثیت اسپیکر نہ صرف اسمبلی کی کار کردگی کو بہتر بنانے میں کامیاب رہے بلکہ کئی ایسے انتظامات بھی کئے جو سنگ میل کی حیثیت رکھتے ہیں۔ ان انتظامات میں تحریک اعتماد بھی شامل ہے جس کے تحت حکومت ہاؤس کا اعتماد حاصل کرنے کے لیے کنفینڈنس موشن پیش کرسکتی ہیں۔ بہار ملک کی واحد ریاست ہے جہاں یہ انتظام ہے۔ اسی طرح انہوں نے کیو آر ایم ایس متعارف کرایا جس کے ذریعہ ممبران اسمبلی آن لائن سوال کر کے اس کے توسط سے جواب حاصل کرسکتے ہیں۔ اسی طرح ان کی با وقار قیادت میں بہار اسمبلی میں کامن ویلتھ پارلیمنٹری ایسوسی ایشن کی سالانہ کانفرنس کا کامیاب انعقاد ہوا جس میں ایسوسی ایشن کی چیئرپرسن ایمیلا منجو واسیفا کا سمیت ملک و بیرون ملک کی ممتاز شخصیتوں نے شرکت کی۔

وجے کمار چودھری موجودہ حکومت میں وزارت تعلیم اور پارلیمانی امور جیسی اہم وزارتوں کی سربرارہی  کر رہے ہیں۔ پارلیمانی امور کی سربراہی کے لیے ان کا انتخاب اس بات کا ثبوت ہے کہ وہ نہ صرف پارلیمانی روایتوں سے واقف  ہیں بلکہ اس سے ان کی انتظامی صلاحیتوں اور فلور مینجمنٹ کی صلاحیتوں کا بھی اندازہ ہوتا  ہے۔ مضبوط حزب اختلاف کی موجودگی میں پارلیمانی امور کی انجام دہی آسان نہیں ہوتی ہے تاہم جس خوش اسلوبی کے ساتھ  وہ  اپوزیشن کا سامنا کرتے ہیں وہ انہی کا حصہ ہے۔

وزیر تعلیم کی حیثیت سے بھی ان کی کار کردگی لائق تحسین ہے۔ تعلیم کے فروغ کے تئیں بے حد سنجیدہ ہیں اور بہار میں تعلیم کا معیار و مقدار بڑھانے کے لیے فکر مند رہتے ہیں۔ ان کا خیال ہے کہ بہار کی صلاحیتوں کا استعمال بہار میں ہونا چاہیے۔ گزشتہ ماہ وزیر اعلی نتیش کمار کی قیادت اور ان کی نگرانی میں ۴۱ ہزار سے زائد اساتذہ کی بحالی ہوچکی ہے اور عنقریب ایک لاکھ اساتذہ کی بحالی ہوگی۔ ان کا خیال ہے جو  با صلاحیت ہیں انہیں موقع ملنا چاہیے۔ وہ کہتے ہیں کہ  جن کے پاس وسائل ہیں وہ اپنے بچوں کو کہیں پڑھا لیتے ہیں لیکن ان کی ترجیح ان بچوں کو پڑھانا ہے جو وسائل سے محروم ہیں۔ اسے وہ ایک چیلنج تسلیم کرتے ہیں اور اسے یقینی بنانے کے لیے فکر مند رہتے ہیں۔ حقیقت یہ ہے کہ تعلیم کے تئیں ان کی اپنی ایک سوچ اور وژن ہے اور اس وژن کو زمین پر اتارنے کی کوشش کرتے ہیں۔ وہ گھسی پٹی ڈگر پر چلنے کے عادی نہیں ہیں۔ ان کا خیال ہے کہ تعلیم کے تئیں بچوں کے سرپرستوں اور عوام کو جس قدر فکر ہونی چاہیے وہ نہیں ہے۔ انہیں اس بات کی شکایت بھی ہے کہ اب تعلیم کو دولت سے جوڑ کر دیکھنے کا سلسلہ چل پڑا ہے۔ تعلیم کا مقصد صرف پیسہ کمانا رہ جائے تو اس سے تعلیم کا معیار گھٹتا ہے۔ ان کا خیال ہے کہ حکومت سہولیات تو مہیا کرسکتی ہے لیکن تعلیم کے تئیں پورے سماج کو بیدار ہونا پڑے گا۔ جناب چودھری کی سب سے بڑی خوبی یہ ہے کہ وہ با مقصد تنقید کو کھلے دل سے قبول کرتے ہیں اور اسی طرح اپنی کمیوں کا اعتراف بھی کرتے ہیں۔ یہ ایک ایسا وصف ہے کہ جو سیاست دانوں میں شاذ و نادر ہی پایا جاتا ہے۔ یہ وصف انہیں دوسرے سیاست دانوں سے ممتاز بھی کرتا ہے۔

نتیش کابینہ میں وجے کمار چودھری کو نمایاں درجہ حاصل ہے۔ وہ وزیر اعلی کے دست راست تصور کئے جاتے ہیں۔ وہ نتیش کمار کی اس کور کمیٹی کے ممبر ہیں جو حکومت اور پارٹی کے لیے پالیسیاں طے کرتی ہے۔ انہوں نے مختلف حیثیتوں میں پارٹی کی بھی خدمت کی ہے اور ہر  عہدہ پر کامیاب رہے ہیں۔

وجے کمار چودھری کا سیکولرزم پر پختہ یقین ہے۔ ہر مذہب اور فرقہ میں یکساں مقبول ہیں۔ سبھوں کو ایک نگاہ سے دیکھتے  اور سب کی ترقی کے لیے فکر مند  رہتے ہیں۔ اپنی صاف ستھری شبیہ اور میٹھی زبان کی وجہ سے بے حد عزت و احترام کی نگاہ سے دیکھے جاتے ہیں۔ بڑا، چھوٹا، امیر ، غریب، دوست، دشمن سب سے  یکساں محبت سے پیش آتے ہیں۔وہ  نرم دم گفتگو گرم دم جستجو کی عمدہ مثال ہیں۔ اردو زبان سے نہ صرف آشنا ہیں بلکہ اس سے محبت بھی کرتے ہیں۔ مجموعی طور پر وہ ایک با بصیرت سیاست داں ہیں۔ غرضیکہ اتنی ساری خوبیاں بیک وقت کسی سیاست داں میں کم ہی پائی جاتی ہیں جن سے قدرت نے جناب چودھری کو نوازا ہے۔یقین ہے کہ وہ وزیر اعلی نتیش کمار کی قیادت میں  اپنی صلاحیتوں سے بہار کی تعلم اور صاف ستھری سیاست کو نئی بلندیوں تک لے جائیں گے۔