ایوان میں نہیں پہنچے نتیش اور وجے سنہا ، اپوزیشن کے ہنگامے کے بعد اجلاس کی کارروائی ملتوی

پٹنہ: بہار قانون ساز اسمبلی میںسموار کو اسپیکر وجے کمار سنہا اور وزیر اعلیٰ نتیش کمار کے درمیان تلخ کلامی کے بعد دونوں منگل کو ایوان میں نہیں آئے، جس پر اپوزیشن کے اراکین نے وزیر اعلیٰ پرچیئرکی توہین کا الزام لگایا اور ان سے معافی مانگنے پر ہنگامہ کیاجس کے باعث وقفہ طعام سے قبل ایوان میں کوئی کارروائی نہ ہوسکی اور ایوان کی کارروائی ملتوی کرنی پڑی۔
منگل کو جب ایوان کی کارروائی شروع ہوئی تو اسپیکر وجے کمار سنہا جب چیئر پر نہیں آئے تو اپوزیشن نے ہنگامہ شروع کردیا۔ ان کی غیر موجودگی میں پریزائیڈنگ ممبر پریم کمار آکر سیٹ پر بیٹھ گئے اور اسمبلی کی کارروائی شروع کرنے کی ہدایت دی۔ جیسے ہی اسمبلی کی کارروائی شروع ہوئی، راشٹریہ جنتا دل (آر جے ڈی) کے اراکین اسمبلی نے اسپیکر کی غیر حاضری کا مسئلہ اٹھایا اور انہیں ایوان میں بلانے کا مطالبہ کیا۔
آر جے ڈی ایم ایل اے للت یادو نے کہا کہ سموار کو وزیر اعلی کو اسپیکر کی توہین کرنے پر معافی مانگنی چاہیے۔ انہوں نے کہا کہ ا سپیکر کے ایوان میں آنے کے بعد ہی کارروائی ہو گی۔

ہاتھوں پر سیاہ پٹی باندھ کر ایوان میں آئے آر جے ڈی کے اراکین اسمبلی نے وزیر اعلیٰ نتیش کمار پر جمہوریت کا قتل کرنے کا الزام لگاتے ہوئے نعرے بازی شروع کردی۔
اس پر پارلیمانی امور کے وزیر وجے کمار چودھری نے کہا کہ وزیر اعلیٰ اور اسمبلی اسپیکر کے درمیان سموار کو ہونے والی بات چیت کو غیر ضروری طور پر اہمیت دی جا رہی ہے۔ وزیر اعلیٰ نے واضح طور پر کہا ہے کہ مقننہ اور ایگزیکٹو کے کام اور ذمہ داریاں آئین میں واضح طور پر بیان کی گئی ہیں۔ دونوں کو ایک دوسرے کا احترام کرنا چاہیے۔ ایک دوسرے کے ساتھ مداخلت ناگوار صورتحال پیدا کرتی ہے۔ اسمبلی کے ا سپیکر نے بھی اسی انداز میں کہا کہ سب کچھ آئین کے مطابق ہونا چاہیے اس لیے دونوں میں کوئی تضاد نہیں ہے۔
مسٹر چودھری نے کہا کہ جہاں تک وزیر اعلیٰ کی طرف سے چیئر یا ایوان کے تئیں کسی بھی اہانت آمیز بیان کا تعلق ہے تو یہ بالکل بے بنیاد ہے کیونکہ وزیر اعلیٰ نے ہاتھ جوڑ کرچیئر سے درخواست کی کہ آئینی روایات ہیںاس پر عمل کیا جائے۔ اس پر اپوزیشن ارکان نے ہنگامہ آرائی شروع کردی۔
پریزائیڈنگ ممبر ڈاکٹر پریم کمار نے ممبران کو پرسکون رہنے اور وزیر کی بات سننے کی تلقین کی لیکن آر جے ڈی ممبران پرسکون نہیں ہوئے اور شور مچاتے رہے۔ آر جے ڈی کے للت یادو نے کہا کہ ایوان کے اسپیکر کو پہلے ایوان میں بلایا جائے۔ اس پر ڈاکٹر کمار نے کہا کہ اسمبلی کے اسپیکر ضرور آئیں گے۔

مسٹر چودھری نے کہا کہ وزیراعلیٰ نے جو باتیں کہیں کہ آئینی طور پر مقننہ اور ایکزیکٹیو کے اپنے ۔ اپنے اختیارات واجبات ہیںکوئی کسی میں مداخلت نہیں کرسکتا ہے اس سے متعلق انہوں نے ہاتھ جوڑ کر درخواست کی ۔
۔ اس پر آر جے ڈی ارکان نے کہا کہ وزیر اعلیٰ نے اسپیکر کی توہین کی اور ان سے کہا کہ آپ کون ہوتے ہیں؟ ایسی بات کسی کے احترام میں نہیں کہی جاتی۔ اسپیکر ایوان میں آکر اس معاملے پر وضاحت دیں۔ ایوان کی توہین اور جمہوریت کا قتل ہوا ہے۔
وزیر پارلیمانی امور نے سوال کیا کہ کیا اسپیکر کو صفائی دینی ہوگی۔ اس پر پریذائیڈنگ ممبر نے کہا کہ ا سپیکر کوصفائی دینے کی کوئی ضرورت نہیں۔ ایوان کی توہین نہیں ہوئی اور جمہوریت کا کوئی قتل نہیں ہوا۔ مسٹر چودھری نے کہا کہ یہ سوال پورے ایوان اور چیئر کا ہے۔ یہ لوگ چیئر کی بات نہیں مانیںگے اور چیئر کی نافرمانی کریں گے لیکن دوسری طرف یہ لوگ چیئر کی توہین کی بات کریں گے۔
انہوں نے کہا کہ وہ صرف یہ کہنے کی کوشش کر رہے ہیں کہ وزیراعلیٰ سمیت پوری حکومت کا ماننا ہے کہ چیئر سب سے اہم ہے، اس لئے انہوں نے سر جھکا کر چیئر سے درخواست کی تھی۔ آج یہ لوگ کہہ رہے ہیں کہ ا سپیکر آکر وضاحت کریں۔ یہ ان کی پارلیمانی جمہوریت کا طریقہ ہے۔

آر جے ڈی کے اودھ بہاری چودھری نے کہا کہ ہم سب جاننا چاہتے ہیں کہ ایوان کیسا چل تھاکہ ایوان کے لیڈر نے اسپیکر کو انگلی دکھاتے ہوئے کہا کہ ایوان ایسے نہیں چلے گا۔ اس کے بعد آر جے ڈی کے ارکان نے ”جمہوریت کا قتل بند کرو اور وزیر اعلیٰ سے معافی مانگو“ کے نعرے لگانے شروع کردیئے۔
وزیر پارلیمانی امور نے کہا کہ وزیر اعلیٰ نے صرف یہ کہا تھا کہ ایوان کو قواعد وضوابط کے مطابق چلنا چاہیے نہ کہ خلاف ضابطہ۔ اس میں کچھ غلط نہیں کہا گیا۔ا سپیکر نے بھی یہی کہا کہ ایوان کو قواعد کے مطابق ہی چلنا چاہیے۔ وزیر اعلیٰ اور اسپیکر ایک ہی بات کر رہے تھے۔ ان کی باتوں میں کوئی فرق نہیں تھا اس لیے ایسی کوئی بات نہیں تھی۔
اس کے بعدپریذائڈنگ کن ڈاکٹر پریم کمار نے کہا کہ پارلیمانی امور کے وزیر نے پوزیشن واضح کر دی ہے، اب سوال جواب کے وقت کی اجازت ہونی چاہیے۔ اس کے بعد انہوں نے مختصر سوال پوچھنے کے لیے آر جے ڈی کے کمار سروجیت کا نام لیا لیکن آر جے ڈی کے ارکان مسلسل نعرے بازی کرتے رہے جس کے بعد اسپیکر نے کارروائی دو بجے تک ملتوی کردی۔

جیسے ہی اسمبلی میں وقفہ طعام کے بعد کی کارروائی شروع ہوئی، اپوزیشن جماعت کے اراکین نے لکھی سرائے معاملے میں اسپیکر مسٹر سنہا کی توہین کرنے کے معاملے پر وزیر اعلیٰ مسٹر کمار کے خلاف ہنگامہ شروع کر دیا۔ اس پر پریزائیڈنگ ممبر پریم کمار نے ممبران پر زور دیا کہ وہ ایوان میں نظم و نسق برقرار رکھیں۔ ان کے بار بار کہنے کے باوجود اپوزیشن ارکان نے ایک نہ سنی اور حکومت مخالف نعرے بازی کرتے رہے۔ وہ اسپیکر کے ساتھ توہین آمیزسلوک پر وزیر اعلی مسٹر کمار سے معافی مانگنے کا مطالبہ کر رہے تھے۔
ہنگامے کے درمیان، دیہی ترقی کے وزیر شراون کمار نے مالی سال 2022-23 کے لیے 15456.46 کروڑ روپے کے محکمہ کی بجٹ ڈیمانڈ پیش کی۔ کانگریس کے رکن وجے شنکر دوبے نے کٹوتی کی تحریک پیش کی لیکن ہنگامہ آرائی کی وجہ سے اس پر بحث نہیں ہو سکی۔ پریذائیڈنگ ممبر مسٹر کمار نے ایوان کو4:50بجے تک ملتوی کر دیا کیونکہ ان کی ایوان کو منظم کرنے کی درخواست ناکام رہی۔
قابل ذکر ہے کہ وزیر اعلی نتیش کمار اور اسمبلی اسپیکر وجے کمار سنہا نے منگل کو وقفہ طعام سے قبل اور بعدبھی ایوان میں شریک نہیں ہوئے ۔