امارت شرعیہ بہار،اڈیشہ وجھارکھنڈ کی زیرنگرانی شہرآہن جمشیدپور کےتمام ائمہ مساجدپرمشتمل تنظیم کی تشکیل

جمشیدپور: دارالقضاءامارت شرعیہ جمشیدپور، جھارکھنڈ میں حسب ہدایت حضرت امیرشریعت مولانا سید احمد ولی فیصل رحمانی مدظلہ العالی شہرکے تمام ائمہ مساجد پرمشتمل امارت شرعیہ بہار،اڈیشہ وجھارکھنڈ پھلواری شریف پٹنہ کی زیرنگرانی "تنظیم ائمہ مساجد جمشید پور ” کی تشکیل عمل میں آئی۔

ائمہ مساجد دراصل دین کےداعی ہیں :احمد حسین قاسمی

علماءوائمۂ مساجد سے صدارتی خطاب کرتے ہوئے امارت شرعیہ پھلواری شریف پٹنہ کے معاون ناظم مولانا احمد حسین قاسمی مدنی نے تنظیم ائمہ مساجد کےاغراض ومقاصد اورموجودہ وقت میں اس کی اہمیت وافادیت پر بھرپور روشنی ڈالی۔ انہوں نے ائمہ مساجد کی ذمہ داریوں اوربہ حیثیت داعی امت ان کے پیغمبرانہ مقام ومنصب کاتذکرہ کرتے ہوئے فرمایاکہ آج بھی امت کےہرفرد تک کوئی پیغام پہنچانےکےلیے منبرومحراب اور مساجد کاکوئی بدل نہیں اور نہ اس سے بہترنظام امت کو مل سکتاہے۔یہ مسجد کے منبرومحراب اس امت کو اللہ کی جانب سے ایک عطیہ ربانی اوربےمثال و نایاب نبوی تحفہ ہیں،مسجد درحقیقت ہمارےاجتماعی نظام کابنیادی ستون ہے۔ ہم اسے اپنےدینی وملی تشخص کی بقاء اور اپنےشرعی اجتماعی نظام کےنفاذکےلئےمشکل سے مشکل حالات میں بھی استعمال کرسکتے ہیــں یہ بھی ایک تلخ حقیقت ہے کہ اس نبوی پلیٹ فارم کا ہم نے کماحقہ استعمال نہیں کیا بلکہ اسے فقط ایک روایتی طرز پر کام میں لایا، اسے حالاتِ حاضرہ کےتناظر  میں ہم کس طرح برت سکتے ہیں اس پر ہمیں آج  مختلف پہلؤوں سے غور کرناہوگا، مسجدہمارےلیے بیک وقت مکتب ومدرسہ بھی ہے اور خانقاہ وعدلیہ بھی، اصلاح حال اور مکارم اخلاق کامرکز بھی، اور امت کی اجتماعیت کا نقطۂ مرکزی بھی، جسے ہم نے نظرانداز کرکےفقط اپنا ملی واجتماعی نقصان کیاہے۔امارت شرعیہ بہاراڈیشہ وجھارکھنڈ پھلواری شریف، جواس ملک میں ملت اسلامیہ کی وحدت کی ایک روشن علامت ہے،اس کاایک اہم شعبہ "شعبہء امور مساجد "ہے جس کاواحدمقصدمساجد کی مرکزیت عظمت رفتہ کوبحال کرناہے اور اس کے نبوی نظام کودوبارہ زندہ کرناہے۔جوامور بھی مساجد سے آپﷺ کےزمانہ میں انجام پاتے تھے ان تمام کاموں کو پھرسے جاری کرنا وقت کی اہم ضرورت ہے۔تعلیم سے لےکر رفاہی اموراورخدمت خلق تک کےتمام کام بآسانی ہم مسجدوں سے کرسکتےہیں امارت شرعیہ موجودہ وقت میں اس جانب بڑی فکر مند ہےخاص کر لاک ڈاؤن کےسبب جبکہ مدارس کانظام بالکل معطل ساہوکر رہ گیاہے۔ایسے میں مسجد کے کاموں کا احیاء اور خصوصا مکاتب دینیہ کےمضبوط نظام کو برپاکرنا ہم ملت اسلامیہ ہندیہ کا فرض اولین ہے،امارت شرعیہ بہاراڈیشہ وجھارکھنڈ کی موجودہ ملی سرگرمیوں کا تعارف کراتے ہوئےموصوف معاون ناظم نے اس کے تعلیمی اقدامات کی تفصیل بھی بیان کی۔

شہر جمشیدپور کےقاضی شریعت مولانا سعود عالم صاحب قاسمی نےاپنے تمہید کلمات میں شہر کےحالات کاجائزہ پیش کیااور جن پہلؤوں سے اصلاح کی ضرورت ہے اس پر بھی تفصيل سے روشنی ڈالی، مسجد سے کیاکیا اصلاحی وانسانی خدمات کی جاسکتی ہیــں ?اس تعلق سے شہر کے اکثربزرگ ومتحرک ائمہ کرام نے اپنی آراء وتجاویز بھی پیش کیں، اخیر میں مشورہ سے اس تنظیم کی سرپرستی شہرکے بزرگ عالم دین امام وخطیب مسجد آم بگان مولانا زین العابدین صاحب کو سونپی گئی، جبکہ دوسری طرف صدر کےلیے حضرت مولانا مفتی امیرالحسن صاحب قاسمی امام وخطیب جامع مسجد دھتکیڈیہ کانام منتخب کیا گیا اورنائب صدرکی حیثیت سے رحمن مسجد ساکچی کے امام وخطیب حضرت مفتی نشاط احمد مظاہری اور ساکچی جامع مسجد کے امام وخطیب مولانا قاری اطہرغزالی صاحب  کوچناگیا۔جبکہ اس کمیٹی کےکنوینر مولانا قاضی سعود عالم صاحب قاسمی اور نائب کنوینر ونگراں امارت شرعیہ جمشیدپور کے نائب قاضی مولانا افروز سلیمی القاسمی صاحب ہوں گے۔

دوسری طرف اس کمیٹی کے جنرل سکریٹری شہر کے متحرک وفعال جواں سال عالم دین مولانا مفتی طلحہ قاسمی امام وخطیب مسجد انوار ہوں گے اور جوائنٹ سکریٹری کے طور پر زون وائز متعددائمہ کرام کےنام شامل کئے گئے ہیں جن میں مولانا مفتی عبدالرؤوف قاسمی امام وخطیب مسجد قمرالدین، مولانا مفتی محتشم باللہ امام وخطیب اقراء مسجد، مولانا مفتی ثابت جاوید امام وخطیب عائشہ مسجد، مولانا مفتی وسیم عثمانی قاسمی امام وخطیب مسجد جگسلائی، مولانا مفتی شاداب امام وخطیب اسکائی ٹیچ، مولانامنت اللہ قاسمی امام وخطیب مسجد اتحاد کپالی، مولانا مرتضیٰ مظاہری امام وخطیب مسجد مخدوم پور، مولانا عبد الخالق امام وخطیب مسجد برمامائنس اور مولانا محمد وقار احمد امام وخطیب مسجد فاطمی کےنام شامل ہیں امارت شرعیہ پھلواری شریف پٹنہ سے تشریف لائے ہوئے علماء میں مولانااحمد حسین قاسمی مدنی معاون ناظم امارت شرعیہ کےعلاوہ مولانا سعود اللہ رحمانی ومولانا نوشاد مظاہری کے نام شامل ہیں۔

اجلاس کی نظامت کے فرائض افروز سلیمی القاسمی صاحب نے انجام دئے جبکہ جلسہ کو کامیاب بنانے میں مولانا سعود اللہ رحمانی ومولانا نوشاد مظاہری مبلغ امارت شرعیہ اور مولانا اظہرصاحب نے کافی محنت کی، اجلاس کااختتام مولانا مفتی زین العابدین صاحب کےناصحانہ کلمات اور دعاء پر ہوا،اجلاس میں شہر جمشیدپور کے اکثر ائمہ مساجد نے شرکت کی اور امارت شرعیہ کےاس عملی اقدام کوخوب سراہا۔