نتیش نے جنتادربار میں ایک 197 لوگوں کے مسائل کو سنا، افسران ضروری کاروائی کی ہدایت دی

پٹنہ:وزیر اعلیٰ نتیش کمار آج 4, دیش رتن مارگ واقع وزیر اعلیٰ سیکریٹریٹ احاطہ میں منعقد ’جنتا کے دربار میں وزیر اعلیٰ‘پروگرام میں شامل ہوئے ۔ جنتا کے دربار میں وزیر اعلیٰ پروگرام میں وزیر اعلیٰ نے ریاست کے متعدد اضلاع سے پہنچے 197 لوگوں کے مسائل کو سنا اور متعلقہ محکموں کے افسران کو حل کر نے کے لیے مکمل کارروائی کی ہدایت دی ۔
آج ’جنتا کے دربار میں وزیر اعلیٰ‘ پروگرام میں جنرل اڈمنسٹریشن محکمہ ، داخلہ محکمہ ، ریوینو و اصلاحات اراضی محکمہ ، شراب بندی محکمہ ، ایکسائز و رجسٹری محکمہ ، نگرانی محکمہ ،کان کنی محکمہ کے معاملوں پر سماعت ہوئی ۔
وزیر اعلیٰ نتیش کمار نے جنتا کے دربار میں حاضر ہو کر لوگوں کو شکایتوں کو سنا ۔ جنتا کے دربار میں ارریا کے فاربس گنج سے آئے ایک شخص نے وزیر اعلیٰ سے سرکاری منصوبوں میں بد عنوانی سے متعلق شکایت کر تے ہوئے کہا کہ بدعنوانی سامنے لانے کے بعد مقامی مکھیا نے ایک مہا دلت خاتون سے جھوٹا مقدمہ کرا دیا ہے ۔ وہ لوگ ہماری جان کے دشمن بنے ہوئے ہیں ۔ ہماری حفاظت کیجئے ۔ وزیر اعلیٰ نے داخلہ محکمہ کو اس پر مناسب کارروائی کرنے کی ہدایت دی ۔
حاجی پور، ویشالی ضلع سے آئے ہوئے مسٹر آنند کمار نے وزیر اعلیٰ سے کہا کہ ہمارے والد کا حاجی پور جیل میں قتل کر دیا گیا ۔ اس کے بعد بھی پولیس نے کوئی کارروائی نہیں کی ۔جیل میں قتل کی بات سن کر وزیر اعلیٰ چونک گئے اور انہوں نے سیدھے ڈی جی پی کواس معاملہ میں مکمل کارروئی کر نے کی ہدایت دی ۔وہیں حاجی پور سے آئے ایک دوسرے شخص نے وزیر ا علیٰ سے کہا کہ ہماری زمین کو زمین مافیاﺅں نے قبضہ کر لیا ہے ۔ہم نے تین تین تھانوں میں درخواست دیا ،لیکن پولیس نے کیس درج نہیں کیا ۔ بلکہ پولیس نے ہمارے باغیچہ میں لگے درختوں کو زمین مافیاﺅں سے مل کر کٹوا دیا ۔وزیر اعلیٰ نے ڈی جی پی کو اس پر مناسب کارروائی کر نے کی ہدایت دی ۔

پریہار ، سیتا مڑھی ضلع سے آئے درخواست دہندہ نے وزیر اعلیٰ سے شکایت کر تے ہوئے کہا کہ سیتا مڑھی ضلع واقع انڈو نیپال سرحد پر اسمگلنگ کر کے ہندوستان لائے جارہے مویشیوں کو ایس ایس بی نے ضبط کر کے تھانہ انچارج بیلا کو سونپ دیا ،لیکن تھانہ انچارج بیلا نے مویشیوں کو فروخت کر کے کروڑوں روپے کا غبن کر لیا ۔ وہیں وارث نگر سمستی پور ضلع کے وپل کمار نے اپنی شکایت میں کہا کہ ان کی بہن کا فوٹو غلط طریقہ سے سوشل میڈیا پر وائرل کیا گیا ہے ۔ اس تعلق سے ہم نے تھانہ انچارج سے شکایت کی مگر انہوں نے اس پر کوئی کارروائی نہیں کی ۔ وزیر اعلیٰ نے ان معاملوں پر ڈی جی پی کو کارروائی کی ہدایت دی ۔
لکشمی پور جموئی ضلع کے ہری چندریادو نے شکایت کر تے ہوئے کہا کہ ان کی 14سالہ بیٹی کا ستمبر 2020 میں دبنگوں نے اغوا کر لیا ۔ ہر جگہ شکایت کی ،نہ میری بچی کا پتہ چلا اور نہ ہی جرائم پیشہ لوگوں کے خلاف کوئی کارروائی ہوئی ۔ وہیں سنگھبلیا ، گوپال گنج کی مسز سنگیتا سنگھ نے سرکاری زمین کو دبنگوں کے ذریعہ غیر قانونی طور سے قبضہ کر نے کے بارے میں اپنی شکایت کی ۔ وزیر اعلیٰ نے ڈی جی پی سے جانچ کر کے مناسب کارروائی کر نے کی ہدایت دی ۔
ایک بیوہ آنگن باڑی سیویکا اپنی شکایت لے کر پہنچی اور انہوں نے بتا یا کہ کس طرح جرائم پیشہ اسے مسلسل پریشان کررہے ہیں ۔ انہوں نے یہ بھی بتا یا کہ 4سال قبل بد معاشوں نے اس کے شوہر کا قتل کر دیا تھا ۔ اس معاملہ میں عدالت کا آرڈر ہو گیا ہے لیکن اب بدمعاش اسے اور اس کے بیٹے کو جان سے مارنے کی دھمکی دے رہے ہیں ۔ وزیر اعلیٰ نے اس پرداخلہ محکمہ سے جانچ کر کے مناسب کارروائی کی ہدایت دی ۔
گورارو ،گیا ضلع کے جناسبودھ کمار نے وزیر ا علیٰ سے فریاد کر تے ہوئے کہا کہ ہمارے والد اگر نکسلی ہیں تو اس کی سزا ہمیں کیوں دی جارہی ہے ۔انہوں نے کہا کہ اس میں ہمارا کیا قصور ہے ۔ دراصل نوجوان کے والد نکسلی ہیں ، اس وجہ سے دونوں بھائیوں کو پرائیوٹ ملازمت سے نکال دیا گیا ہے ۔ کمپنی نے بتا یا کہ آئی بی اور پولیس کی رپورٹ پر آپ کو نوکری سے نکالا جارہا ہے ۔ آگے انہوں نے بتا یا کہ دونوں بھائیوں کو نوکری سے نکالے جانے کے بعد ہماری ماں ڈپریشن میں چلی گئی ہے ۔ یہ شکایت سن کر وزیر اعلیٰ نے کہا کہ یہ بات تو درست ہے کہ والد کی سزا بیٹے کو کیوں ؟اس کے بعد فوری وزیر اعلیٰ نے افسران سے معاملہ کی جانچ کر تے ہوئے آگے کارروائی کی ہدایت دی ۔

ایک نو جوان نے شکایت کر تے ہوئے کہا کہ جرائم پیشہ افراد نے پہلے ہمارے والد کا قتل کر دیا ۔ اب ہمیں جان سے مارنے کی دھمکی دے رہے ہیں ۔ یہ شکایت سن کر وزیر اعلیٰ نے فوری ڈی جی پی کو کہا کہ نوجوان کے والد کاقتل ہوا ہے ، لیکن ملزم ابھی تک گرفتار نہیں ہوا ہے ۔ پھر سے دھمکی دے رہا ہے ، اس پر جلد کارروائی کریں ۔
بسنت پور ،سیوان کے ایک شخص نے وزیر اعلیٰ سے شکایت کر تے ہوئے کہا کہ دبنگوں نے پٹروال پمپ کھولنے کے لیے ان کی زمین کو غلط طریقہ سے قبضہ کر لیا ہے ۔ اور الٹے انہیں مقدمہ میں پھنسادیا گیا ہے ۔ وہیں اجیار پور ، سمستی پور ضلع کی ایک خاتون نے وزیر اعلیٰ سے شکایت کر تے ہوئے جہیزمیں موٹر سائیکل کا مطالبہ پورا نہ ہو نے پر انہیں سسرال والوں نے چھوڑ دیا ہے ۔ وزیر اعلیٰ نے درخواست دہندہ کی شکایت پر جلد کارروائی کر نے کی ہدایت دی ۔
’جنتا کے دربار میں وزیر اعلیٰ‘پروگرام میں ریوینو اور اصلاحات اراضی کے وزیر رام سورت کمار ، شراب بندی ،ایکسائز اور رجسٹری محکمہ کے وزیر سنیل کمار ، وزیر اعلیٰ کے پرنسپل سیکریٹری مسٹر دیپک کمار ، چیف سیکریٹری مسٹر تریپوراری شرن ، ڈی جی پی ایس کے سنگھل ، ڈیو لپمنٹ کمشنر مسٹر عامر سبحانی ، ایڈیشنل چیف سیکریٹری داخلہ مسٹر چیتنیے پرساد ، وزیر اعلیٰ کے پرنسپل سیکریٹری مسٹر چنچل کمار ، متعلقہ محکموں کے پرنسپل سیکریٹری ، سیکریٹری ، وزیر اعلیٰ کے سیکریٹری مسٹر انوپم کمار ، وزیر اعلیٰ کے او ایس ڈی مسٹر گوپال سنگھ ،پٹنہ کے ڈی ایم مسٹر چندر شیکھر سنگھ اور ایس ایس پی مسٹر اپندر شرما موجود تھے ۔