اٹھارہ سال سے زائد عمرکے شہریوں کو مفت ویکسین ، ریاستوں کی ذمہ داری ختم : مودی

نئی دہل:کورونا وبا سے نمٹنے کے لئے ملک بھر میں چلائی جا رہی ویکسینیشن مہم کے حوالے سے اٹھ رہے سوالات کے درمیان مرکزی حکومت نے آج ایک بڑا فیصلہ لیتے ہوئے 18 سال سے زیادہ عمر کے تمام شہریوں کو مفت ویکسین فراہم کرنے کا اعلان کیا اور ریاستوں کو ویکسین خریدنے کی ذمہ داری سے آزاد کر دیا ۔

اس کے علاوہ مرکزی حکومت کی جانب سے گذشتہ سال کورونا کی پہلی لہر کے بعد لاگو کی گئی ’پردھان منتری غریب کلیان ان یوجنا‘ کا فائدہ دوسری لہر کے بعد بھی لوگوں کو دینے کے لئے اس کی مدت میں دیوالی تک توسیع کرنے فیصلہ کیا ۔ وزیراعظم نریندر مودی نے پیر کے روز قوم سے خطاب میں یہ اعلان کیا ۔

انہوں نے کہا ’’ آج یہ فیصلہ لیا گیا ہے کہ ریاستوں کے پاس ویکسینیشن سے متعلق 25 فیصد کام تھا ، اس کی ذمہ داری حکومت ہند اٹھائے گی۔ ان دو ہفتوں میں مرکزاورریاستی سرکاریں مل کر نئے رہنما خطوط کے مطابق ضروری تیاری کر لیں گی ۔ آئندہ 21 جون پیر سے ملک کی ہر ریاست میں 18 سال سے زیادہ عمر کے تمام شہریوں کے لئے حکومت ہند ریاستوں کو مفت ویکسین دستیاب کرائے گی‘‘ ۔

مسٹر مودی نے کہا ’’ ویکسین مینوفیکچررز سے ویکسین کی پیداوار کا 75 فیصد حصہ حکومت ہند خود خرید کر ریاستی حکومتوں کو مفت دے گی ۔ ملک کی کسی بھی ریاستی حکومت کو اس ویکسین پر کچھ بھی خرچ نہیں کرنا پڑے گا۔ اب تک ملک کے کروڑوں لوگوں کو مفت ویکسین مل چکی ہے ۔ اب 18 سال کی عمر کے لوگ بھی اس میں شامل ہوں گے۔ ملک کے تمام شہریوں کے لئے حکومت ہند ہی مفت ویکسین فراہم کرے گی ۔ ملک میں تیارشدہ ویکسین میں سے 25 فیصد ،پرائیوٹ سیکٹر کے اسپتال براہ راست لے پائیں گے‘‘۔

انہوں نے کہا کہ پرائیوٹ اسپتال ویکسین کی مقررہ قیمت کے بعد ایک خوراک کے لئے زیادہ سے زیادہ 150 روپے ہی سروس چارج وصول کرسکیں گے۔ اس کی نگرانی کا کام ریاستی حکومتوں کے پاس ہی ہوگا۔

مسٹرمودی نے کہا کہ یہ فیصلہ صرف ریاستوں کے مطالبے اور تجاویز پر لیا گیا ہے کیونکہ جب ریاستوں کو ٹیکہ کاری سے متعلق اصل صورتحال کا پتہ چلا تو انہوں نے پرانے نظام کی بحالی کا مطالبہ کرنا شروع کردیا ۔ ریاستوں کے اس مطالبے پر غور کیا گیا اور اسی کی بنیاد پر پرانے نظام کی بحالی کا فیصلہ کیا گیا۔
اس سے قبل انہوں نے اس فیصلے کے پس منظر کی وضاحت کرتے ہوئے کہا ’’ اس سال 16 جنوری سے شروع ہو کر اپریل کے اواخر تک ہندوستان کا ویکسینیشن پروگرام بنیادی طور پر مرکزی حکومت کی نگرانی میں ہی جاری رہا ۔ سبھی کو مفت ویکسین لگنے کے راستے پر ملک گامزن ہے۔
ملک کے شہری نظم و ضبط کی پیروی کرتے ہوئے ، اپنی باری پر ویکسین لگوا رہے تھے۔ کئی ریاستی حکومتوں نے پھر کہا کہ ویکسین کا کام ڈی سنٹرلائز کیا جائے اورریاستوں پر چھوڑ دیا جائے ۔ طرح طرح کی آوازیں اٹھیں ۔ کچھ آوازیں تواسی بھی اٹھیں کہ بزرگوں کا ویکسینیشن پہلے کیوں ہورہا ہے ؟ مختلف دباؤ بھی بنائے گئے ، ملک کے میڈیا کے ایک حصے نے اسے ایک مہم کی شکل میں بھی چلایا۔ یہ بھی کہا گیا تھا کہ ٹیکے لگانے کے لئے عمر کے گروپ کیوں بنائے گئے ‘‘۔
انہوں نے کہا کہ مرکزی حکومت کے سامنے مختلف تجاویز بھی آنے لگیں ، مختلف مطالبات کئے جانے لگے ۔ پوچھا جانے لگا، سب کچھ حکومت ہند ہی کیوں طے کررہی ہے؟ ریاستی حکومتوں کو چھوٹ کیوں نہیں دی جارہی ہے؟ کسی نے کہا کہ عمر کی حد آخرمرکزی سرکار ہی کیوں طے کر ے ۔

وزیر اعظم نے کہا کہ مرکزی حکومت ویکسینیشن جیسے پروگراموں ، جس سے کروڑوں باشندوں کی جان بچائی جانی ہے اس معاملے میں کسی تو تو میں میں میں نہیں پڑنا چاہتی ، اس لئے ریاستوں کو ویکسین خریدنے کی ذمہ داری سے آزاد کیا گیا ہے۔
دوسرا بڑا اعلان کرتے ہوئے انہوں نے کہا ’’ آج ، ویکسینیشن کے علاوہ ایک اور بڑے فیصلے سے میں آپ کو آگاہ کرنا چاہتا ہوں ۔ گزشتہ سال جب لاک ڈاؤن نافذ کرنا پڑا تھا تو پردھان منتری غریب کلیان ان یوجنا کے تحت 80 کروڑملک کے باشندوں کو 8 ماہ تک مفت راشن دیا گیا تھا۔ دوسری لہر کی وجہ سے مئی اور جون میں بھی اس اسکیم میں توسیع کی گئی ۔ آج حکومت نے فیصلہ کیا ہے کہ اس اسکیم کواب دیوالی تک بڑھایا جائے گا ۔ حکومت غریب کی ہر ضرورت کے ساتھ اس کی ساتھی بنی ہے ۔ نومبر تک 80 کروڑ غریبوں کو مقررہ مقدار میں مفت اناج فراہم کیا جائے گا ۔ میرے کسی غریب بہن بھائی کو اور اس کے اہل خانہ کو بھوکا نہیں سونا پڑے گا ۔

خطاب کے آغاز میں مسٹر مودی نے کورونا وبا وجہ سے پیداشدہ صورتحال کا تفصیلی ذکر کرتے ہوئے کہا ’’ گزشتہ سو برسوں میں آئی یہ سب سے بڑی وبا ہے ۔ اس طرح کی وبا جدید دنیا نے نہ دیکھی تھی اور نہ ہی محسوس کی تھی ۔
اتنی بڑی عالمی وبا سےہمارا ملک کئی محاذوں پر ایک ساتھ لڑا اور دوسری لہر کے دوران اپریل اور مئی کے مہینوں میں ہندوستان میں میڈیکل آکسیجن کی مانگ میں کافی اضافہ ہوا تھا ۔ ہندوستان کی تاریخ میں کبھی بھی اتنی مقدار میں میڈیکل آکسیجن کی ضرورت محسوس نہیں کی گئی ۔ اس ضرورت کو پورا کرنے کے لئے جنگی بنیادوں پر کام کیا گیا تھا ۔ حکومت کی ساری مشینری اس کام مصروف ہو گئی ‘‘۔
ملک میں ٹیکہ کاری کے پروگراموں کی صورتحال کے حوالے سے معلومات دیتے ہوئےانہوں نے کہا ’’سنہ 2014 میں ٹیکہ کاری کی شرح 60 فیصد تھی لیکن ہم نے پانچ سات برسوں میں ویکسینیشن کی کوریج 60 فیصد سے بڑھا کر 90 فیصد کردی ہے ۔ ہم نے ویکسینیشن کی رفتار اوردائرہ دونوں بڑھا دیا ہے ۔ بچوں کو کئی مہلک بیماریوں سے بچانے کے لئے کئی نئے ٹیکوں کو اس مہم کا حصہ بنایا ۔
ہمیں اپنے ملک کے بچوں کی فکر تھی ، غریب کی فکر تھی ، غریب کے بچوں کی فکر تھی ، جن کو کبھی بھی ٹیکہ لگ ہی نہیں پایا تھا۔ ہم صحیح طرح سے آگے رہے تھے کہ کورونا وائرس نے ہمیں گھیر لیا۔ ملک ہی نہیں بلکہ دنیا کے سامنے پرانے خدشات پیدا ہو گئے کہ ہندوستان اتنی بڑی آبادی کو کیسے بچا پائے گا ۔