انل رادھا کرشن کملبے: وہ گیند باز جس نے ٹسٹ میچ میں جم لیکر کے ریکارڈ کی برابری !

نئی دہلی:(یوم پیدائش 17 اکتوبر پر خصوصی پیشکش ) انل کمبلے، ہندوستان کا وہ کھلاڑی جو کسی تعارف کا محتاج نہیں۔ اپنے چھ فٹ سے بھی زیادہ قد کی وجہ سے انہیں ’جمبو‘ کے نا م سے بھی جانا جاتا ہے۔
انل کمبلے کی پیدائش 17 اکتوبر 1970کو کرناٹک کے شہر بنگلورمیں ہوئی۔ ان کا پورا نام انل کمبلے رادھا کرشن کمبلے ہے۔ انہوں نے اپنی ابتدائی تعلیم ہولی سینٹ انگلش اسکول بنگلور سے حاصل کی۔ کالج سے فارغ ہونے کے بعد انہوں اعلی تعلیم حاصل کرنے کے لئے انجینئرنگ کالج میں داخلہ لیا۔ 1992 میں انہوں نے مکینیکل انجینئرنگ کی ڈگری حاصل کی۔
انل کمبلے کرکٹ ٹیم انڈیا کے دائیں کے بہترین لیگ اسپنر رہے۔ ہندستان کے بہترین اسپین گیند بازوں کی جب بھی بات کی جاتی ہے تو اس میں سرفہرست انل کمبلے کا نام ہی آتا ہے، چونکہ لیگ بریک گگلی اسپنر انل کمبلے کا شمار ان چنندہ ہندستانی گیند بازوں میں ہوتا ہے جنہوں نے 100 وکٹ حاصل کرنے کے لئے 21 ٹسٹ میچوں سے بھی کم وقت لیا۔کمبلے ہندوستان کے پہلے اسپنر اور دوسرے گیند باز ہیں جنہوں نے مقررہ اووروں میں بین الاقوامی کرکٹ میں 200 وکٹ حاصل کئے۔
ابتدائی دور میں انل کمبلے ہندستانی ٹیم میں بطور بلے باز ہی پچ پر اترے۔ ان کی شبیہ بھی ایک بلے باز جیسی تھی۔ لیکن بعد میں انہوں نے اپنی لیگ اسپین گیند بازی پر خاص توجہ دی۔ پھر وہ اپنی گیند

بازی میں اتنے مشاق ہو گئے تھے کہ بلے بازی کی طرف کم توجہ گئی۔

اپنی نپی تلی گیندوں سے حریف ٹیم کے کھلاڑیوں کو پریشانی میں ڈالنے والے لیگ بریک گیند باز انل کمبلے نے کرناٹک کی جانب سے اپنا پہلا فرسٹ کلاس کرکٹ میچ حیدر آباد کے خلاف 1989 میں کھیلا۔ اپنے پہلے ہی میچ میں انہوں نے شاندار گیندبازی کرتے ہوئے چار کھلاڑیوں کو آؤٹ کرکے ٹیم میں اپنی جگہ مستحکم کرلی۔ دن بہ دن اپنی گیند بازی میں سدھار لانے، لائن اور لینتھ کا خاص خیال رکھنے، بلے باز کو رن لینے میں دشوایاں پیدا کرنے میں ان کو مہارت حاصل ہوتی چلی گئی۔ان کی شاندار کارکردگی کے پیش نظر انہیں پاکستان کے خلاف انڈر-19 ٹیم میں منتخب کرلیا گیا۔
انہوں نے رنجی ٹرافی میں ریاستی کرکٹ ٹیم کے کپتانی بھی کی۔ ایرانی کپ میں انہوں نے 13 وکٹ لئے۔ انل کمبلے انڈیا۔ ایشا الیون، کرناٹک، لیسسٹر شائر ، نارتھمپٹن شائر، رائل چیلنجربنگلور اورسرے جیسی ٹیموں کے لئے کھیل چکے ہیں۔
انل کمبلے نے سری لنکا کے خلاف 1990 میں اپنا پہلا بین الاقوامی کرکٹ کھیلا اور اسی برس انگلینڈ کے خلا ف وہ اپنا ٹسٹ میچ کھیلنے میدان میں اترے۔ کمبلے 132 ٹسٹ میچوں میں 236 اننگز میں 619 وکٹ حاصل کرکے ہندستان کیا جانب سے سب سے کامیاب گیند باز ہونے کا شرف بھی حاصل ہے۔ اسی کے ساتھ ساتھ ایک روزہ میچوں میں 265 اننگز میں 337 وکٹ لینے کا اعزاز بھی ان کے نام ہے۔

انہوں نے 1998 میں زمبابوے کے خلاف کھیلتے ہوئے اپنے 200 وکٹ مکمل کئے۔ 1995 میں وہ پہلے گیند باز بن گئے تھے جنہوں نے 5برسوں کی مدت میں 100 وکٹ حاصل کئے۔ 1994 میں انہوں نے نیوزی لینڈ کے خلاف 10 اوور میں 33 رن دے کر 5وکٹ لینے کا ریکارڈ بھی بنایا۔انہوں نے آئی پی ایل کے 42 میچوں کی 42 اننگز میں 45 وکٹ حاصل کئے۔ ٹی 20میں کمبلے نے اپنی بہترین گیند بازی کا مظاہرہ سال 2009 میں بنگلور میں راجستھان کے خلاف 5 رن دے کر 5 وکٹ حاصل کئے۔
کمبلے نے132 ٹسٹ میچوں میں 236 اننگز کھیلیں جس میں انہوں نے 18335 رن دے کر 619 وکٹ حاصل کئے، جبکہ244 فرسٹ کلاس میچوں میں انہوں نے 1136 وکٹ حاصل کئے۔ ٹی -20 میچوں میں بھی انہوں نے 54 میچ کھیل کرمجموعی طور پر 57 وکٹ حاصل کئے۔
وہ دن کرکٹ کے شیدائیوں کو ہمیشہ یا درہے گا جب انل کمبلے نے دہلی کے فیروز شاہ کرکٹ میدان پر 7 فروری 1999 کو دیرینہ حریف پاکستان کے خلاف کھیلتے ہوئے تنہا ہی پوری ٹیم کے تمام کھلاڑیوں کو آؤٹ کیا۔ یہ کارنامہ انہوں نے26.3 اوور میں محض 74 رن دے کر دکھایا۔ اس سے قبل انگلینڈ کے آف اسپینر جم لیکر نے ایک ہی اننگز میں 10 وکٹ لینے کا یہ ریکارڈ بنایا تھا۔ اس کامیابی کے بعد بنگلور میں ایک اہم چوراہے کا نام بھی ان کے نام پر رکھا گیا۔
انہوں نے2007 میں انگلینڈ کے خلاف ٹسٹ میچ میں اپنی اکلوتی سنچری بنائی تھی جس میں انہوں نے 110 رن بنائے جبکہ اس میچ میں ہدف ہی 118 رن کا تھا۔انہوں نے بین الاقوامی کرکٹ میچوں میں سری لنکا کے شان کرینن کا پہلا وکٹ لیا تھا جبکہ اپنے آخری میچ میں آسٹریلیاکے مشیل جانسن کو انہوں نے اپنا نشانہ بنایا۔

انہوں نے سب سے زیادہ 56 وکٹ شارجہ کرکٹ اسٹیڈیم میں حاصل کیں۔کپِل دیو کے بعد وہ دوسرے ہندستانی گیند باز تھےجنہوں نے ٹسٹ میچوں میں 400 وکٹ حاصل کئے۔
کمبلے نے ہندوستان کے لئے تقریباً 18 برسوں تک اپنی خدمات انجام دیں ۔ 1990 سے 2008 کےدرمیان اپنے ٹسٹ کریئر میں انہوں نے 132 میچوں میں 29.65 کی اوسط سے 18355 رن دے کر 619 وکٹ حاصل کئے۔ دائیں ہاتھ سے کھیلنے والے کھلاڑی انل کمبلے ہندستان کے کپتان کے فرائض بھی انجام دے چکے ہیں۔
جون 2016 سے 2017 تک ہندستانی کرکٹ کے کوچ بھی مقرر کئے گئے۔انہوں نے مارچ 2007 میں بین الاقوامی کرکٹ سے رٹائرمنٹ کا اعلان کیا۔رٹائرمنٹ کے وقت انہوں نے کچھ باتیں اپنے مداحوں سے شیئر کی۔ انہوں نے کہا ’’کرکٹ محض ایک کھیل ہے۔ جب آپ کھیلتے ہیں تو جیت ہار یقینی ہے۔ تب یہ کھیل سے کہیں بڑا لگتا ہے۔ لیکن جب آپ گھر واپس آتےہیں اور اپنی فیملی اور گھروالوں کو دیکھتے ہیں تو لگتا ہے کہ نہیں یہ صرف کھیل ہی ہے اس سےزیادہ کچھ نہیں۔‘‘
انل کمبلے کو 1995میں حکومت ہند کی جانب سے ’ارجن ایوارڈ‘ سے سرفراز کیا گیا۔1996 میں وژڈن کرکٹرز آف دی ایئر کے اعزاز سے نوازا گیا۔ 2005 میں حکومت ہند کی جانب سے پدم شری ایوارڈ سے سرفراز کئے گئے۔ پھر 2015 میں آئی سی سی کرکٹ ہال آف دی میچ انعام دیا گیا۔