کسان یونینوں کا ’بھارت بند‘

نئی دہلی:مرکزی حکومت کے تین نئے زرعی قوانین کی مخالفت کررہی کسان یونینوں کا ’بھارت بند مہم‘ پیر کی صبح 6:00 بجے شروع ہوئ ۔

تقریبا 40 تنظیموں کے متحدہ کسان مورچہ نے پیر کو صبح 6:00 بجے سے شام 4:00 بجے تک ملک بھر میں جگہ جگہ دھرنے اور مظاہروں کا اعلان کیا تھا۔ ان تنظیموں نے کہا ہے کہ وہ مختلف مقامات پر قومی شاہراہوں پر ٹریفک روکیں گے۔

کانگریس اور کچھ دیگر اپوزیشن جماعتوں نے کسانوں کے بھارت بند کی حمایت کی ۔ دوسری جانب مرکزی وزیر زراعت نریندر سنگھ تومر نے کسانوں سے اپیل کی ہے کہ وہ احتجاج کا راستہ چھوڑکر بات چیت سئے مسئلے کا حل نکالیں۔

کسانوں کے آج کے احتجاج کے اعلان کے پیش نظر جگہ جگہ ٹریفک متاثر ہونے کے امکان تھے۔ ہریانہ، اتر پردیش اور دہلی سمیت کئی دیگر ریاستوں کی پولیس نے صورتحال سے نمٹنے کے لیے خصوصی انتظامات کیے گئے تھے۔

ٹکیٹ نے حکومت پر دھوکہ دہی کا الزام لگایا

: کسان رہنما راکیش ٹکیت نے آج حکومت پر کسانوں کے ساتھ دھوکہ دہی کا الزام لگاتے ہوئے کہا کہ ضرورت ہوئی تو دس برس تک کسان تحریک چلائی جائے گی۔
مسٹر ٹکیٹ نے کسانوں کے بھارت بند کو تحریک کا حصہ قرار دیتے ہوئے کہا کہ گزشتہ دس ماہ سے کسان تین زرعی قوانین کو واپس لینے کا مطالبہ کے پیش نظر قومی دارالحکومت کے مضافات میں مہم چلا رہے ہیں اور اگر حکومت کی ہٹ دھرمی جاری رہی تو یہ تحریک دس سال تک چلائی جا سکتی ہے۔ انہوں نے کہا کہ سڑکوں کو سیل نہیں کیا گیا ہے بلکہ ضروری خدمات کو بند سے آزاد رکھا گیا ہے۔ دودھ اور پھل سبزیوں کی فراہمی، امتحانات دینے والے طلباء اور بیمار لوگوں کو بند سے آزاد رکھا گیا ہے۔
انہوں نے کہا کہ حکومت تین زرعی قوانین واپس نہیں لے رہی ہے اور کسانوں سے بات کرنا چاہتی ہے۔ کیا وہ کسانوں کو بیوقوف سمجھتی ہے؟ انہوں نے کہا کہ آج لوگوں کو اپنے گھروں میں رہ کر بھارت بند کی حمایت کرنی چاہیے اور اگر ضرورت ہو تو چار بجے کے بعد گھروں سے نکلنا چاہئے۔ ایسا نہیں کرنے پر وہ جام میں پھنسیں گے۔
کسان رہنما نے کہا کہ ان کی تحریک پرامن ہے اور وہ جمہوری ڈھنگ سے اپنے مطالبات اٹھا رہے ہیں۔ دریں اثنا اہم اپوزیشن جماعتوں نے کسانوں کے بھارت بند کی حمایت کی ۔
دوسری جانب مرکزی وزیر زراعت نریندر سنگھ تومر نے بھی کسان یونینوں سے احتجاج کا راستہ چھوڑ کر بات چیت کرنے کی درخواست کی ہے۔ انہوں نے کہا کہ کسان یونین جو بھی تجاویز دیں گی اس پر کھلے ذہن سے غورو خوض کیا جائے گا۔

مہاراشٹر میں حکمراں کانگریس اور این سی پی نے بھارت بند کی حمایت کی

مہاراشٹر کی برسراقتدار اتحاد پارٹنر کانگریس اور نیشنلسٹ کانگریس پارٹی (این سی پی) نے مرکزی حکومت کے تین زرعی قوانین ، ایندھن کی بڑھتی قیمتوں اور ملک میں بڑھتی ہوئی مہنگائی کے خلاف احتجاج کرنے کے لیے سینکت کسان مورچہ کی بھارت بند کال کی حمایت کی ۔
ممبئی پردیش کانگریس کمیٹی کے صدر اشوک جگتاپ عرف بھائی جگتاپ نے بتایا کہ بھارتیہ جنتا پارٹی (بی جے پی) کی قیادت والی مرکزی حکومت نے ملک کے شہریوں سے جھوٹے وعدے کیے ہیں اور آمرانہ انداز میں کام کررہی ہے۔
انہوں نے بتایا کہ مرکز زرعی مخالف تین قوانین لے کر آیا ہے اور اس کے علاوہ بینکوں ، ہوائی اڈوں اور بندرگاہیں صنعت کاروں کو فروخت کررہی ہے۔
این سی پی کے ترجمان مہیش تاپسی نے بتایا”این سی پی نے اس وقت سے کسانوں کی حمایت کرنے کا فیصلہ کیا جب سے زرعی مخالف قوانین منظور کئے گئے۔ یہ اقدام کسان تحریک کا حصہ ہے اور ہم اس کی حمایت کر رہے ہیں۔
شیو سینا کے رکن پارلیمنٹ اور پارٹی کے ترجمان سنجے رات نے کہا کہ "کسانوں نے بھارت بند کی کال دی ہے اور چونکہ وہ ہمیں خوراک فراہم کرتے ہیں مہاراشٹر میں ہر کوئی ان کی حمایت کر رہا ہے۔”

بھارت بند کے دوران سونی پت میں تمام شاہراہیں بند رہیں

سونی پت:بھارت بند کے اعلان پر متحدہ کسان مورچہ نے ہریانہ کے ضلع سونی پت میں خاصا اثر ڈالا۔ ضلع سے گزرنے والی قومی ، ریاستی شاہراہوں کے علاوہ ، کسانوں نے کے جی پی-کے ایم پی ایکسپریس وے کو تقریبا 10 گھنٹے تک بند رکھا جبکہ تقریبا 8 گھنٹے تک کسان سونی پت میں ریلوے ٹریک پر کھڑے رہے۔
ضلع میں 22 مقامات پر کسانوں نے سڑکوں پردھرنا دیا۔ شام 4 بجے کسانوں نے تمام سڑکیں اور پٹریاں خالی کر دیں ، لیکن دن کے دوران ڈرائیوروں کو کافی پریشانیوں کا سامنا کرنا پڑا۔ اس کے ساتھ ساتھ شہر کی مارکیٹ کھلی رہیں لیکن گاہک غیر حاضر رہے۔ سرکاری دفاتر میں کام کرنے والے ملازمین نے مختلف یونینوں کی قیادت میں بند میں شرکت کی ، جس کی وجہ سے میونسپل کارپوریشن ، بجلی کارپوریشن ، محکمہ صحت عامہ ، محکمہ آبپاشی ، بینک اور دیگر محکموں میں ملازمین کی کم حاضری تھی۔ تاہم ، زیادہ تر ملازمین منی سکریٹریٹ میں موجود تھے اور کام آسانی سے جاری رہا۔

بند کا اثر سکول کالجوں پر بھی نظر آیا اور بچوں سے لے کر عملے تک حاضری 30-40 فیصد رہی۔ بھارت بند میں کسانوں کے علاوہ مختلف مزدور یونینوں اور ٹریڈ یونینوں نے جوش و خروش سے حصہ لیا۔ کے جی پی۔ کے ایم پی کے زیرو پوائنٹ پر اوپر اور نیچے ، ایچ ایچ -44 پر انٹرنیشنل فروٹ اینڈ ہرٹیکلچر مارکیٹ ، ہلدانہ بارڈر ، رائی کے پاس ، سونی پت میں جہاری چوک کا گول چکر ، گوہانہ روڈ پر ہنومان مندر ، گوہانہ روڈ پر بڈواسنی ، پگتھالہ روڈ ، جھروتی روڈ روہتک روڈ پر سیسانہ کے قریب ، کنولی ٹول پلازہ پر کسانوں نے درمیانی سڑک پر ڈیرے ڈالے اور سڑک بلاک کر دی۔ اس کے علاوہ گوہانہ کے علاقے میں کئی مقامات پر جام بھی لگایا گیا۔
روڈ ویز پر بند کا بہت اثر پڑا۔ سونی پت سے پانی پت ، روہتک ، گوہانہ ، بروت ، دہلی ، جے پور ، آگرہ ، شملہ اور سمپلا وغیرہ جانے والی بسیں بند رہیں۔ تاہم روڈ ویز کے ذریعے صبح 36 بسیں چلائی گئیں جن میں سے 7 جام میں پھنس گئیں۔ اس کے بعد باقی بسوں کو روک دیا گیا۔ ٹرینوں کے رکنے کے بعد مسافروں نے بس اسٹینڈ کی طرف جانا شروع کیا ، لیکن بسوں کے نہ چلنے کی وجہ سے مسافروں کو نجی گاڑیوں کا سہارا لینا پڑا۔
خیال رہے پیر کو متحدہ کسان مورچہ کی کال پر کسانوں نے بھارت بند کے دوران ریل روٹ بلاک کردیا۔ اس کی وجہ سے ، کوچی چنڈی گڑھ ایکسپریس اور ایک مال ٹرین سونی پت ریلوے اسٹیشن پر گھنٹوں کھڑی رہی۔ اس کے علاوہ ریل کی ناکہ بندی کی وجہ سے 8 ٹرینوں کو منسوخ کرنا پڑا اور 12 ٹرینیں اپنے مقررہ وقت سے 7 گھنٹے سے زیادہ تاخیر کا شکار ہوئیں، جس کی وجہ سے سینکڑوں مسافر دن بھر سونی پت ریلوے اسٹیشن پر پھنسے رہے۔